Një histori e pazakontë: Vajza e fshehtë e Freddie Mercury
Sipas autorës britanike Lesley-Ann Jones, e njohur për biografitë e saj mbi artistë të mëdhenj si Freddie Mercury, David Bowie dhe The Beatles, këngëtari legjendar i grupit Queen thuhet se ka pasur një vajzë të fshehtë, të lindur në vitin 1976 nga një lidhje e fshehtë me gruan e një miku të ngushtë. Në librin e saj më të ri “Love, Freddie”, që pritet të publikohet këtë shtator, Jones rrëfen historinë e kësaj vajze – tashmë 48-vjeçare – e cila ka jetuar e fshehur nga publiku, por jo nga Mercury, që sipas librit, e ka njohur, dashur dhe mbështetur gjatë gjithë jetës së tij.
Skepticizëm dhe mungesë e provave të ADN-së
Pas publikimit të kësaj historie, shumë fansa në rrjetet sociale janë shprehur dyshues, duke kërkuar prova të drejtpërdrejta shkencore për të konfirmuar lidhjen biologjike mes Mercury-t dhe vajzës. Autorja Jones ka deklaruar në rrjetin X (ish-Twitter) se “verifikimi i nevojshëm është marrë” dhe se “ekipet ligjore janë përfshirë”, por ka theksuar se masa të tilla janë private dhe nuk ndahen publikisht. Megjithatë, mungesa e një testi ADN-je të publikuar apo e ndonjë deklarate zyrtare nga rrethi i afërt i Mercury-t, përfshirë anëtarët e Queen apo Mary Austin, vijon të mbajë këtë histori në kufijtë mes misterit dhe dyshimit.
