Një avion i kompanisë Air India, i tipit Boeing 787-8 Dreamliner, që po udhëtonte nga Hong Kongu drejt New Delhit, u detyrua të kthehej urgjentisht në Aeroportin Ndërkombëtar të Hong Kongut të hënën, vetëm disa minuta pas ngritjes për shkak të një problemi teknik të dyshuar.
Fluturimi AI315, i cili ishte nisur në orën 12:20 me orën lokale, u ul pa probleme rreth orës 13:15. Ekuipazhi kishte raportuar vështirësi teknike dhe kishte kërkuar leje për një ulje emergjente. Autoritetet thanë se asnjë pasagjer nuk u lëndua dhe operacioni i uljes nuk ka ndikuar në aktivitetin e aeroportit.
Sipas një deklarate nga Air India, kthimi i avionit ishte një masë parandaluese dhe mjeti po i nënshtrohet kontrolleve të imtësishme teknike. Avioni në fjalë është 7-vjeçar dhe kishte arritur lartësinë prej 22,000 metrash përpara se të niste zbritjen.
Ky është incidenti i dytë për Air India në më pak se dy javë që përfshin avionë të të njëjtit model. Vetëm disa ditë më parë, një tjetër Boeing 787 që fluturonte nga Londra drejt Indisë pësoi një ulje emergjente në Ahmedabad pas problemeve menjëherë pas ngritjes. Fatkeqësisht, ajo ngjarje rezultoi fatale për dy pasagjerë.
Këto raste po ngrejnë sërish alarmin për sigurinë e avionëve Boeing, një kompani që në vitet e fundit ka përjetuar kriza të përsëritura që kanë tronditur imazhin e saj global.
As Air India dhe as Boeing nuk kanë dhënë ende komente përfundimtare mbi shkaqet teknike të incidentit të fundit në fluturimin Hong Kong – New Delhi.
