A mund të imagjinoni të blini një unazë për vetëm 10 paund, duke menduar se është thjesht një aksesor i lirë, dhe vite më vonë të rezultojë se mbani në gisht një diamant të rrallë me vlerë afro 850 mijë dollarë?
Kjo ndodhi me një grua në Londër, e cila në vitet ’80 bleu një unazë nga një “car boot sale” – treg i improvizuar ku njerëzit shesin gjëra nga bagazhet e makinave të tyre. Për dekada, ajo e mbajti unazën kudo, madje edhe gjatë punëve të shtëpisë, duke menduar se ishte një bizhuteri e zakonshme.
Por një ditë, një orëndreqës kurioz e këshilloi të bëjë një kontroll profesional. Dhe surpriza ishte mahnitëse: unaza përmbante një diamant 26.27 karatësh, i prerë në stilin antik të shekullit të 19-të, i fshehur nga një montim i thjeshtë argjendi.
Në ankandin prestigjioz të Sotheby’s në Londër, diamanti – që më pas u pagëzua si “Tenner Diamond” – u shit për £656,750, afërsisht $847,000!
Tobias Kormind, ekspert i diamantëve dhe drejtor menaxhues i kompanisë 77 Diamonds, parashikon se çmimi përfundimtar prej 656,750 £ (847,667 $) i unazës është vetëm një pjesë e vogël e asaj që ajo mund të vlejë një ditë.
“Pronari i ri ka të ngjarë ta ri-presë diamantin në një formë moderne që do të reflektojë edhe më shumë shkëlqim dhe potencialisht të ketë një vlerë disa herë më të lartë se çmimi i sotëm,” tha ai në një deklaratë për shtyp.
“Jam i bindur se unaza prej 10 £ (13 $) ka qenë dikur në pronësi të ndonjë mbreti apo personi me pasuri të madhe, sepse daton nga vitet 1800 – përpara zbulimit të minierave moderne të diamantëve, në një kohë kur shumë pak diamantë ishin në qarkullim.”
Jessica Wyndham, eksperte e bizhuterive, tha:
“Ishte një diamant me stil të vjetër, i dizajnuar për të shkëlqyer në dritën e qirinjve. Prandaj nuk binte në sy në jetën moderne.”
Çfarë mësojmë nga kjo histori?
- Mos e nënvlerëso kurrë një send të vogël. Ai mund të fshehë një thesar!
- Kontrolli profesional bën diferencën.
- Bizhuteritë e vjetra shpesh fshehin vlera të rralla.
Thesare të papritura
Edhe pse të rralla, raste të ngjashme të objekteve të nënvlerësuara rëndë që janë gjetur në tregje të përdorura apo shitje garazhi, kanë ndodhur edhe më parë.
Në mars të vitit 2013, një tas qeramike i blerë për vetëm 3 dollarë në një shitje oborri u shit për plot 2.2 milionë dollarë në një ankand në New York. Në mars të vitit 2014, një vezë e artë e blerë si skrap metalik u zbulua më pas se ishte një vezë Fabergé me vlerë 33 milionë dollarë, e cila dikur i përkiste Carit Aleksandri III.
Kush e di? Ndoshta edhe në sirtarin tënd ka ndonjë “xhevahir” që pret të zbulohet!
