E gjetur si relike në garazh: Alfa Romeo Montreal 1972 del në shitje pas dekadash heshtjeje
Për shumë vite qëndroi e heshtur në një garazh, por tani një Alfa Romeo Montreal e vitit 1972 ka dalë në dritë si një nga zbulimet më të rralla në botën e automobilizmit klasik. Me vetëm 59,000 milje të përshkuara, kjo ikonë italiane po kërkon një pronar të ri – dhe është në shitje për 55,000 euro.
Kjo nuk është një makinë e zakonshme. Montreal-i, një model i prodhuar në numër të kufizuar nga Alfa Romeo në fillim të viteve ‘70, mishëronte një epokë ku dizajni, pasioni dhe performanca ndërthureshin në mënyrë të përsosur. Projektuar nga Marcello Gandini – një nga mendjet më të ndritura të dizajnit automobilistik italian – makina ruan akoma linjat e saj të mprehta, aerodinamike dhe elegante.
Motori V8 2.6 litra që ndodhet nën kapakun e saj ishte një novacion për kohën, duke ofruar jo vetëm fuqi, por edhe një tingull unik që bënte Montreal-in të dallohej në çdo rrugë. Detaje si grilat mbi fenerët, ventilimi në kapak dhe pjesët e brendshme të dorës së parë e bëjnë këtë automjet jo vetëm një objekt koleksioni, por një copë arti mbi rrota.
Ajo që e bën këtë Montreal edhe më të veçantë është historia e saj: një makinë që për vite të tëra ka qëndruar në heshtje, e mbrojtur nga koha, pa u përdorur apo modifikuar. Ky ruajtje e kujdesshme e ka mbajtur atë në një gjendje të jashtëzakonshme, çka e bën akoma më të lakmueshme për koleksionistët dhe adhuruesit e klasikëve të vërtetë.
Sot, kur makina moderne shpesh harrojnë emocionin e vërtetë të ngarjes, një Alfa Romeo Montreal e ruajtur kaq mirë vjen si një kujtesë e bukur për një kohë kur çdo detaj kishte rëndësi. Një copë nostalgjie e paketuar me finesë, e gatshme për të ndezur motorin sërish.
