MIT Media Lab publikon rezultatet që po ndezin alarmet në shkollat e gjithë botës
Një studim i ri tronditës nga MIT Media Lab ka ngritur shqetësime të thella mbi përdorimin e inteligjencës artificiale si ChatGPT në procesin mësimor duke sugjeruar se kjo teknologji, në vend që të ndihmojë, mund të dëmtojë zhvillimin e trurit dhe aftësitë mendore, veçanërisht te të rinjtë.
Studiuesit përfshinë 54 pjesëmarrës të moshës 18 deri 39 vjeç nga zona e Bostonit, të ndarë në tre grupe: një grup që përdori ChatGPT për të shkruar ese të stilit SAT, një grup që përdori Google Search, dhe një grup pa ndihmë fare. Gjatë gjithë procesit, ata u monitoruan me EEG për të matur aktivitetin e trurit në 32 zona të ndryshme.
Rezultatet ishin alarmante: përdoruesit e ChatGPT kishin aktivitetin më të ulët mendor, performancën më të dobët gjuhësore dhe sjellje më pasive. Me kalimin e muajve, ata gjithnjë e më shumë mbështeteshin në kopjim dhe ngjitje, pa përfshirje reale mendore.
“Jam e frikësuar se pas 6-8 muajsh ndonjë politikan do të propozojë ‘kopsht me GPT’. Do të ishte katastrofike për trurin e fëmijëve,” tha Nataliya Kosmyna, autorja kryesore e studimit.
A po i bën fëmijët tanë më dembelë dhe më të vetmuar ChatGPT?
Këto gjetje përputhen me një tjetër artikull paralajmërues nga revista TIME, ku tregohet se ndërsa disa shkolla në SHBA po eksperimentojnë me përdorimin e AI në mësimdhënie, ekspertët paralajmërojnë se mbështetja e tepërt tek AI mund të çojë në rënien e mendimit kritik dhe përvetësimin pasiv të dijes.
Studime të tjera të MIT kanë treguar gjithashtu se sa më shumë njerëzit përdorin ChatGPT, aq më të vetmuar ndihen – një tjetër efekt anësor shqetësues në një kohë ku shoqëria është gjithnjë e më e lidhur me teknologjinë, por shpesh më e shkëputur emocionalisht.
Një thirrje urgjente për arsimtarët dhe prindërit
Studiuesit kërkojnë kujdes maksimal në integrimin e inteligjencës artificiale në shkolla, duke theksuar se ajo duhet të përdoret si mjet ndihmës, jo si zëvendësim i mendimit njerëzor.
“AI duhet të jetë partner në të mësuar, jo patericë,” përfundon Kosmyna.
A është koha të rishikojmë marrëdhënien tonë me AI përpara se të jetë tepër vonë?
Ky studim nuk është vetëm një paralajmërim – është një thirrje për të zgjuar ndërgjegjen kolektive.
Lexo edhe: Google “Vret” Kërkimin Klasik: IA Tregon Çdo Gjë Pa Klikuar Asnjë Link!
