Zyrtarët e muzeut sqarojnë vendndodhjen e kukullës, pas lajmeve të rreme që tronditën rrjetin
Pas përhapjes së lajmeve në rrjetet sociale se kukulla e famshme “Annabelle” ishte zhdukur nga muzeu, zyrtarët e institucionit kanë reaguar duke hedhur poshtë çdo dyshim. Kukulla, e njohur për historinë e saj të frikshme që frymëzoi filmat horror “The Conjuring” dhe “Annabelle”, ndodhet e sigurt në Muzeun Okult të familjes Warren në Connecticut, SHBA.
Zërat për zhdukjen nisën pasi disa përdorues pretenduan se ajo nuk ishte e pranishme gjatë një ndalese të turneut “Devils on the Run” në New Orleans, ndërkohë që situata u përshkallëzua më tej pas një incidenti me zjarr në resortin Nottoway, ku kukulla kishte qenë më parë e ekspozuar.
Dan Rivera, hetues kryesor i Shoqatës për Kërkime Psikike të New England (NESPR), ka mohuar kategorikisht këto pretendime, duke deklaruar se Annabelle nuk është lëvizur dhe vazhdon të qëndrojë në vendin e saj, brenda kutisë së xhamit që e mban të izoluar për arsye sigurie.
Kukulla “Annabelle”, një lodër e zakonshme e tipit Raggedy Ann, ka fituar famë të errët për shkak të historive që lidhen me aktivitet paranormal dhe entitete të dyshuara demoniake. Për këtë arsye, ajo mbahet në një kuti të mbyllur në muze, për të parandaluar çdo ndikim të saj mbi ambientin përreth.
Zyrtarët e muzeut kanë apeluar për kujdes ndaj informacionit të pasaktë që qarkullon online dhe kanë siguruar publikun se nuk ka asnjë arsye për panik – Annabelle është ende aty, pikërisht aty ku ka qenë gjithmonë.
