Forcat e Sigurisë të Forcave Ajrore të SHBA-së u angazhuan të premten në mbrëmje për të reaguar ndaj aktivitetit të dyshuar të paautorizuar të dronëve mbi bazën RAF Lakenheath në Suffolk, në lindje të Anglisë. “Asnjë anëtar i personelit, avion apo infrastrukturë nuk u prek”, tha një zëdhënës i Forcave Ajrore amerikane, duke përsëritur se ato po bashkëpunojnë ngushtë me autoritetet britanike për sigurinë e ushtarëve, civilëve dhe familjeve të tyre.
Ministria britanike e Mbrojtjes njoftoi se forcat amerikane iu përgjigjën raportimeve dhe se situata është zgjidhur, ndërsa po punohet për të sqaruar faktet. Deputeti i Suffolk-ut Perëndimor, Nick Timothy, tha se nuk ka rrezik për publikun. Banorët raportuan se kishin dëgjuar alarme nga baza, por sirenat nuk janë konfirmuar zyrtarisht. Forcat Ajrore nuk thanë kush i operoi dronët dhe as nëse është rritur niveli i sigurisë.
Incidenti ndodh pak ditë pasi baza e Lakenheath dhe ajo e Mildenhall forcuan masat e mbrojtjes, ndërsa disa avionë amerikanë u larguan nga Mildenhall. Sipas raportimeve të medias amerikane, masat lidhen me një kërcënim të paspecifikuar nga Irani, gjë që autoritetet nuk e kanë konfirmuar publikisht.