Kombëtarja fitoi 2-0 ndeshjen Shqipëri-Finlandë të enjten mbrëmjen në stadiumin “Air Albania” në Tiranë, në sfidën e parafundit të Grupit C të Ligës së Kombeve. Golat i shënuan Ernest Muçi në minutën e 35-të dhe Rei Manaj me kokë në minutën e 50-të, pas një krosimi të Elseid Hysajt, raporton Pamfleti. Finlanda mbeti me dhjetë lojtarë në minutën e 67-të, kur Miro Tenho u ndëshkua me karton të kuq.
Me këtë fitore, kuqezinjtë ngjiten në krye të grupit me 12 pikë pas pesë ndeshjesh, dy më shumë se Bjellorusia. Shqipërisë i mjafton vetëm një pikë në ndeshjen e fundit ndaj Bjellorusisë, që luhet më 15 nëntor në transfertë. Para ndeshjes, biletat ishin shitur të gjitha, siç e kemi raportuar.
Gjatë ndeshjes, një pjesë e tifozëve në stadium kënduan në kor “Rama jep dorëheqjen”, sipas një videoje që ish-deputeti Ervin Salianji publikoi në Facebook, raporton BalkanWeb. “Rama ik, Rama jep dorëheqjen, oshëtin stadiumi! Autokrati është i papranueshëm, fundi i tij është si i çdo tirani!”, shkroi Salianji. Thirrjet vijnë ndërsa diaspora po përgatit protestën e 28-29 nëntorit në Tiranë kundër kryeministrit.