Qytetarë, studentë dhe pedagogë shënuan të martën 164 ditë protestë para godinës së Kryeministrisë në Tiranë, duke kërkuar largimin e kryeministrit Edi Rama. Ata përsërisin se nuk pranojnë dialog me kreun e qeverisë dhe se dorëheqja e tij mbetet kërkesë e panegociueshme, raporton Pamfleti.
Gjatë këtyre muajve janë raportuar përplasje mes protestuesve dhe policisë, si dhe arrestime të pjesëmarrësve. Protestuesit thonë se këto episode nuk do t’i ndalin, ndërsa studentët kanë paralajmëruar protesta kombëtare çdo të mërkurë dhe të shtunë. Rasti i 17-vjeçarit Erind Goclari, i cili u gjobit pas një proteste, ka nxitur edhe një fushatë solidariteti në diasporë.
Për 28 nëntorin është paralajmëruar një protestë masive, ku sipas organizatorëve pritet të bashkohen edhe shqiptarë që jetojnë jashtë vendit, shkruan BalkanWeb. Ndërkohë, profesori Neritan Ceka ka sugjeruar që lëvizja studentore të shndërrohet në një forcë politike.
