Komisioni Evropian ka nisur negociatat për ta përfshirë Kosovën, Shqipërinë dhe katër vende të tjera të Ballkanit Perëndimor në zonën pa roaming të Bashkimit Evropian, raporton Sinjali. Skema “Roam Like at Home” u lejon qytetarëve të telefonojnë, të dërgojnë mesazhe dhe të përdorin internetin mobil në vendet e Unionit pa tarifa shtesë. Krahas Kosovës dhe Shqipërisë, në proces janë përfshirë Bosnjë e Hercegovina, Mali i Zi, Maqedonia e Veriut dhe Serbia.
Nisma ishte paralajmëruar nga presidentja e Komisionit, Ursula von der Leyen, gjatë vizitës së saj në rajon në tetor. Sipas Komisionit, zbatimi nuk do të jetë i menjëhershëm, sepse fillimisht duhet të përmbyllen marrëveshjet dypalëshe dhe vendet e rajonit duhet ta harmonizojnë plotësisht legjislacionin me rregullat e BE-së për roaming-un. Vetëm pas kësaj, Komisioni do t’i kërkojë Këshillit të BE-së miratimin për zgjerimin e zonës.
Këshilli i BE-së kishte autorizuar nisjen e këtyre negociatave në qershor, ndërsa marrëveshjet do të mbështeten te Marrëveshjet e Stabilizim-Asociimit me secilin vend. Për qytetarët dhe diasporën që udhëtojnë shpesh drejt vendeve të BE-së, hapi do të sillte më pak shpenzime, por afati i zbatimit mbetet ende i paqartë. Lajme të tjera për ekonominë në Kosovë gjeni te shkrimi për sistemin e pagesave të menjëhershme TIPS-K dhe te rubrika Ekonomi.
