Një gjykatës federal në Florida lejoi të martën të vazhdojë padia për shpifje prej 10 miliardë dollarësh e presidentit amerikan Donald Trump kundër BBC-së, pasi transmetuesi britanik kishte kërkuar rrëzimin e saj, raporton BBC. Gjykatësi Jeffrey Kuntz hodhi poshtë megjithatë një pretendim të dytë, të ngritur sipas ligjit të Floridës për praktikat mashtruese dhe të padrejta tregtare.
Trump e akuzon BBC-në se “manipuloi qëllimisht, me dashakeqësi dhe në mënyrë mashtruese” fjalimin e tij të 6 janarit 2021, në një episod të programit Panorama që bashkoi dy pjesë të ndryshme të fjalimit para trazirave në Kapitol. BBC-ja ka kërkuar falje, duke pranuar se transmetimi krijoi “përshtypjen e gabuar se Trump bëri thirrje të drejtpërdrejtë për dhunë”, por pohon se programi nuk i plotëson kriteret ligjore të shpifjes dhe nuk ishte i disponueshëm në SHBA. Trump e quajti vendimin “fitore të madhe”, ndërsa një zëdhënës i BBC-së tha se transmetuesi është “i befasuar”, por respekton autoritetin e gjykatës.
Gjykatësi theksoi se nuk ka vendosur për themelin e çështjes dhe se nëse Trump mund t’i provojë pretendimet dhe dëmet “mbetet për një ditë tjetër”. Sipas BBC-së, presidenti është urdhëruar të japë dëshmi nën betim deri më 11 dhjetor, pasi anuloi një seancë të mëparshme. Lajme të tjera nga Uashingtoni gjeni te rubrika Amerika dhe te shkrimi për betejën e Pete Hegsethit për postin.
