Ushtria gjermane i ka ndaluar me efekt të menjëhershëm dronët kinezë të përdorimit komercial në bazat ushtarake dhe në terrenet e stërvitjes, sipas gazetës Der Spiegel. Dronët e këtij lloji që u janë dhënë njësive ushtarake vitet e fundit do të tërhiqen nga shërbimi sa më shpejt të jetë e mundur, raporton Sinjali.
Sipas një strategjie të vitit 2024, komandantët lokalë mund t’i blinin vetë këto pajisje nga një “listë e bardhë” sistemesh të miratuara, ku bënin pjesë edhe disa modele të DJI, prodhuesit më të madh të dronëve në botë. Meqë nuk ekziston një regjistër qendror i blerjeve, ushtria nuk arriti të identifikonte të gjitha pajisjet në përdorim dhe vendosi për një ndalim të përgjithshëm. Shqetësimi kryesor në ushtritë perëndimore është se teknologjia kineze mund të shfrytëzohet nga Pekini për të mbledhur informacione të ndjeshme.
Vendimi i Berlinit vjen pas një mase të ngjashme amerikane: ushtria e SHBA-së ka ndaluar së fundmi hyrjen e makinave elektrike të kompanisë kineze BYD në Bazën Ajrore Kadena, në ishullin japonez Okinava. Kadena është objekti më i madh ajror amerikan në Azinë Lindore. Për dronët ushtarakë që kalojnë edhe mbi vendin tonë lexoni raportimin tonë për RQ-4D Phoenix, ndërsa lajme të tjera gjeni te rubrika Teknologji.
