Norvegjia po ndërton Rogfast, një tunel nënujor 27 kilometra të gjatë në bregun perëndimor të vendit, i cili pas përfundimit do të jetë tuneli rrugor nënujor më i gjatë dhe më i thellë në botë. Pika më e thellë e tij do të arrijë 392 metra nën nivelin e detit, ndërsa tuneli do të lidhë zonat e Stavangerit dhe Haugesundit, sipas Sinjalit.
Projekti përbëhet nga dy tunele të veçanta me nga dy korsi secili dhe përfshin një rrethrrotullim të dyfishtë rreth 260 metra nën det për lidhjen me ishullin Kvitsøy. Ekipet që gërmojnë nga dy skajet duhet të takohen me një devijim jo më të madh se 5 centimetra, prandaj përdoren skanerë lazer që mbledhin deri në 2 milionë pika të dhënash në sekondë. Ndërtuesit përballen edhe me depërtime të ujit të kripur, që kërkojnë teknika të posaçme për izolimin e shkëmbinjve.
Punimet nisën në janar të vitit 2018, u ndërprenë në fund të vitit 2019 për shkak të rritjes së kostove dhe rifilluan në fund të vitit 2021, sipas Administratës Norvegjeze të Rrugëve. Përfundimi pritet në vitin 2033, me një kosto rreth 2,4 miliardë dollarë, si pjesë e planit për një korridor pa tragete përgjatë bregdetit, ku sot i gjithë itinerari kërkon rreth 21 orë udhëtim dhe shtatë tragete. Më shumë nga bota e inovacionit lexoni te rubrika Teknologji, ku shkruam edhe për serrën e astronautëve në Hënë.
