Gjykata e Posaçme e Apelit dënoi të mërkurën përfundimisht me 7 vite e 4 muaj burg ish-shefin e Forcës së Posaçme Operacionale, Oltion Bistri, duke ndryshuar vendimin e shkallës së parë, raporton Telegrafi. Trupi gjykues e shpalli Bistrin fajtor edhe për pastrim parash dhe korrupsion pasiv, akuza për të cilat më parë nuk ishte dënuar.
Apeli vendosi gjithashtu konfiskimin e pasurisë së tij, konkretisht tri apartamente, dy biznese dhe 1,3 milionë euro. Bistri ishte arrestuar në vitin 2023 në kuadër të operacionit “Metamorfoza” dhe kishte dalë i lirë në nëntor 2025, pasi Gjykata e Posaçme e kishte dënuar vetëm me 2 vite për nxjerrjen e të dhënave sekrete, sipas BalkanWeb. Tani ai duhet të rikthehet në burg për të vuajtur pjesën e mbetur të dënimit.
Për të pandehurit e tjerë në këtë çështje, mes tyre Edmond Preka dhe ish-prokurori Xhevahir Lita, Apeli la në fuqi dënimet e shkallës së parë. Dënimi i një prej drejtuesve më të lartë të Policisë së Shtetit për korrupsion rikthen pikëpyetjet për pastërtinë e strukturave që qeveria i paraqiste si shtylla të luftës kundër krimit. Për hetimet e tjera të drejtësisë së posaçme lexoni edhe rastin e deputetes Sara Mila në SPAK.