Kryeministri Edi Rama, i cili në fushatë premtoi anëtarësimin e Shqipërisë në Bashkimin Evropian deri në vitin 2030, deklaroi të martën nga Forumi i Paqes në Paris se “nuk premton dot asgjë për Europën”. Sipas tij, anëtarësimi në BE do të varet edhe nga ajo se “ku do të jetë BE për 2-3 vjet” dhe çfarë France do të dalë nga zgjedhjet e vitit të ardhshëm, raporton Pamfleti.
Rama tha se, bazuar në raportin e progresit të Komisionit Evropian, viti 2027 është viti i punës për Traktatin e Anëtarësimit dhe se negociatat mund të mbyllen në fund të vitit të ardhshëm “nëse çdo gjë shkon mirë”. “Unë kurrë nuk premtoj dot për gjëra që s’varen prej meje”, shtoi ai. Kjo do të thotë se edhe mbyllja e negociatave, hap i domosdoshëm para anëtarësimit, mbetet një objektiv i kushtëzuar.
Ndryshimi i tonit vjen ndërsa ambasadorja e BE-së ka paralajmëruar se afati për reformën zgjedhore është i ngushtë dhe në Parlamentin Evropian ngrihen pyetje për kullat e Tiranës. Sipas Pamfletit, kryeministri po e lidh tani objektivin e vitit 2030 me zhvillime politike që nuk varen nga Shqipëria.
