Deputetja socialiste Sara Mila u paraqit të mërkurën në Prokurorinë e Posaçme (SPAK), në kuadër të një hetimi për dyshime se ndihma ekonomike u përdor për të blerë vota në qarkun e Elbasanit. Mila, deputetja më e votuar në këtë qark, u thirr si person në dijeni, sipas BalkanWeb. Deri tani nuk ka njoftim zyrtar nga SPAK për objektin e plotë të hetimit apo për ndonjë akuzë ndaj saj.
Gazetarja Klodiana Lala raporton se SPAK ka regjistruar procedim penal për korrupsion në zgjedhje, pas një dosjeje që nisi në Prokurorinë e Elbasanit me përgjime ndaj zyrtarëve vendorë dhe drejtuesve të institucioneve lokale. Nga bisedat e përgjuara dyshohet se ndihma ekonomike u jepej në mënyrë selektive njerëzve në vështirësi, me qëllim që ata të votonin për kandidaten Mila. Nëse dyshimet vërtetohen, rasti do të tregonte se si fondet sociale të shtetit u kthyen në mjet fushate për partinë në pushtet.
Pas daljes nga SPAK, Mila e quajti çështjen “një kalvar i gjatë i hedhjes së baltës nga politika e vjetër” dhe tha se do të jetë në dispozicion të drejtësisë sa herë të nevojitet. Ndërsa ajo fliste para kamerave, një qytetare i bërtiti “hajdute” dhe e akuzoi se kishte hyrë në Kuvend me votat e krimit, raporton BalkanWeb. Hetimi për Elbasanin shtohet te dosjet e SPAK-ut që prekin figura të Partisë Socialiste.
1 koment