Gjithnjë e më shumë qytete të mëdha po i shndërrojnë ndërtesat e zyrave në apartamente, dhe tani radhën e ka La Défense, lagjja e biznesit e Parisit. Autoriteti që drejton zonën ka paraqitur plane për të kthyer deri në një të pestën e ndërtesave me zyra në banesa, sipas shembullit të Nju Jorkut, Uashingtonit dhe Londrës, raporton BBC.
Kompania Groupama Immobilier synon ta kthejë tërësisht në apartamente ndërtesën nëntëkatëshe Le Diamant, ku sot punojnë 1.800 vetë. Sfida më e madhe është hapësira në mes të çdo kati, ku nuk arrin drita natyrore, ndaj aty do të mbeten vetëm ashensorët dhe shkallët, tha zëvendësdrejtori i kompanisë, Roland Cubin. Probleme të tjera janë nevoja për më shumë tubacione dhe tavanet që shpesh janë shumë të ulëta.
Arsyeja kryesore është rënia e kërkesës për zyra që nga pandemia e Covid-19 dhe përhapja e punës nga shtëpia. Sipas drejtuesit të Paris La Défense, Pierre-Yves Guice, sot janë bosh 14 deri në 15 për qind e zyrave të zonës, ndërsa kompania Colliers vlerëson se kërkesa për zyra në Paris ka rënë me gati një të tretën në pesë-gjashtë vitet e fundit. Edhe në Shqipëri, ku shtrenjtësia e jetesës rëndon mbi familjet, banimi mbetet ndër temat më të nxehta, siç e shihni te rubrika Stil jete.
