Bashkimi Evropian në Kosovë ka shprehur shqetësim serioz për ndryshimet në ligjin për Dhomat e Specializuara, të njohura si Gjykata Speciale, që Kuvendi mund t’i votojë të premten, 13 nëntor. Në një reagim në Facebook, BE-ja thotë se ndryshimet vënë në pikëpyetje detyrimet ndërkombëtare të Kosovës dhe parimet e sundimit të ligjit, sipas Sinjalit.
Shqetësimet lidhen me pavarësinë e gjyqësorit, mbrojtjen e viktimave dhe dëshmitarëve, vazhdimësinë e të drejtave procedurale dhe llogaridhënien. BE-ja ngre pikëpyetje edhe për kushtetutshmërinë e ndryshimeve dhe kërkon konsultime paraprake para çdo miratimi. Pak më vonë, ambasada e Gjermanisë në Kosovë deklaroi: “Ne pajtohemi plotësisht me këtë deklaratë të BE-së”.
Projektligji u fut në rendin e ditës me kërkesë të PDK-së, pasi deputetja Vlora Çitaku paraqiti një mocion procedural që u miratua me shumicë votash. Seanca e së enjtes u ndërpre kur deputetët nuk u kthyen pas pauzës, ndaj kryetarja e Kuvendit, Albulena Haxhiu, e shtyu vazhdimin për të premten në orën 11:00, njofton Kuvendi. Më shumë lajme nga Prishtina gjeni te rubrika Kosovë.
