Kryeministri i Kosovës, Albin Kurti, u prit të mërkurën nga presidenti francez Emmanuel Macron në Pallatin Elysée në Paris, ku i kërkoi mbështetje për rrugën e Kosovës drejt Bashkimit Evropian. Takimi u zhvillua gjatë vizitës së Kurtit në kryeqytetin francez, ku ai mori pjesë edhe në Forumin e Paqes në Paris, njofton Pamfleti.
“Theksova rëndësinë e mbështetjes së Francës për marrjen e statusit të vendit kandidat dhe hapjen e negociatave për anëtarësim në Bashkimin Evropian”, shkroi Kurti në Facebook pas takimit. Sipas tij, dy udhëheqësit folën edhe për mundësi të reja bashkëpunimi mes Kosovës dhe Francës, për integrimin euroatlantik dhe për sigurinë në rajon.
Kosova e dorëzoi kërkesën për anëtarësim në BE në dhjetor të vitit 2022, por ende nuk e ka marrë statusin e vendit kandidat. Kurti e vlerësoi gjithashtu nismën e Macronit për mbrojtjen e fëmijëve nga rreziqet e përdorimit gjithnjë e më të madh të teknologjisë. Për zhvillimet e fundit diplomatike të Prishtinës lexoni edhe për ambasadorin e ri amerikan në Kosovë dhe ndiqni rubrikën Kosovë.
