Ish-shefi i Forcës së Posaçme Operacionale, Oltion Bistri, nuk u gjet të enjten në banesën e tij në Tiranë, kur policia shkoi për të zbatuar vendimin e Gjykatës së Posaçme të Apelit që e kthen në burg. Një ditë më parë, Apeli e kishte dënuar me 7 vite e 4 muaj heqje lirie në dosjen “Metamorfoza”.
Sipas burimeve të BalkanWeb, Bistri dyshohet se është larguar rreth një muaj më parë drejt Greqisë, përmes pikës kufitare të Kakavijës, ndërsa nuk dihet nëse Greqia është vendmbërritja e fundit apo vetëm vend tranzit. Deri tani nuk ka asnjë njoftim zyrtar për vendndodhjen e tij. Sipas llogaritjeve të SPAK, të cituara nga Pamfleti, atij i mbeten për të vuajtur edhe 3 vite, 10 muaj e 14 ditë burg.
Apeli e shpalli fajtor për korrupsion pasiv dhe pastrim parash, duke rrëzuar vendimin e shkallës së parë, që e kishte dënuar vetëm për zbulim të të dhënave sekrete, dhe urdhëroi konfiskimin e pasurive të tij. Sipas dosjes, Bistri i përcillte biznesmenit Pëllumb Gjoka informacione për kontrollet e policisë ndaj bizneseve të tij të lojërave të fatit. Rasti ngre sërish pyetjen se si një ish-zyrtar i lartë i policisë mund të largohet nga vendi pa u vënë re nga askush.