Një paciente e Spitalit Onkologjik në Tiranë rrëfeu të mërkurën në protestën para Kryeministrisë se bashkëshorti i saj, i sëmurë me kancer në mushkëri, nuk ka marrë kimioterapi që nga 28 shtatori, sepse mungon ilaçi Docetaxel, raporton BalkanWeb. Ajo e tregoi historinë për gazetarin e News24, Osman Stafa.
Gruaja, e cila është vetë paciente prej tre vitesh dhe është operuar në gjoks, tha se bashkëshorti duhej të merrte seancën e tretë, që bëhet çdo 15 ditë. Sipas saj, as Drejtoria e Shëndetësisë dhe as Ministria e Shëndetësisë nuk u kanë dhënë përgjigje, ndërsa ekzaminimi PET Scan, që duhej bërë para 6-7 muajsh, u është premtuar për vitin 2027. Në privat ai kushton rreth 1.600 euro.
“Unë kam 32 vite punë, burri 42 vite punë. Kemi punuar për këtë shtet dhe, kur vjen fundi, nuk ka ilaçe”, tha ajo. Rrëfimi u dëgjua mes studentëve, të rinjve dhe pedagogëve që vijojnë protestën para Kryeministrisë, duke kërkuar dorëheqjen e Edi Ramës dhe një qeveri teknike. Mungesa e ilaçeve është një tjetër akuzë që qytetarët ia drejtojnë qeverisë, ditë pas protestës kombëtare.
