Kryetari i Partisë Mundësia, Agron Shehaj, e cilësoi të martën takimin mes përfaqësuesve të Partisë Socialiste dhe Partisë Demokratike për reformën zgjedhore si vazhdim të “pazareve” politike të 35 viteve të fundit, raporton BalkanWeb. Sipas tij, dy partitë e mëdha po e përdorin reformën si pretekst për ta ndryshuar Kodin Zgjedhor sipas interesave të tyre.
“E njëjta tryezë, të njëjtat gjëra, të njëjtat figura”, deklaroi Shehaj, duke shtuar se në takim ishte edhe një përfaqësuese e Bashkimit Evropian, e cila me të drejtë kërkon “ndryshime për t’i bërë zgjedhjet më demokratike”. Sipas tij, PS-ja dhe PD-ja nuk i dëgjojnë kërkesat që u drejtohen, por bëjnë pazarin e tyre. “Njerëzit duan ndryshimin, duan largimin e kësaj klase politike dhe, sido që ta gatuajnë kodin zgjedhor, ndryshimin nuk e ndalin dot”, tha ai.
Reagimi vjen ndërsa ambasadorja e BE-së ka paralajmëruar se afati për reformën zgjedhore është i ngushtë. Ndërkohë, Enno Bozdo ka ftuar opozitën të bashkohet dhe të dalë me kandidatë të përbashkët kundër Partisë Socialiste.
